Nagtapok ang mga nasyonal ug lokal nga opisyal sa Sugbo alang sa “Usapang Budget Natin” Forum nga gipahigayon sa DepEd Ecotech Sudlon, Cebu City karong adlawa, Pebrero 20, 2026.
Ang maong dayalogo nagtumong sa paghisgot sa 2026 National Budget ug gipangunahan sa Office of the Executive Secretary, Department of Budget and Management (DBM), ug Presidential Communications Office.
Gibuksan ang programa pinaagi sa usa ka pasundayag gikan sa Abellana National School Choir, nga gisundan sa mga mensahe gikan nila ni Cebu City Mayor Nestor D. Archival ug Cebu Governor Pamela S. Baricuatro.
Mihatag usab og overview si DBM Acting Secretary Rolando U. Toledo mahitungod sa 2026 General Appropriations Act, samtang ang mga representante gikan sa nagkalain-laing ahensya sama sa DOH, DepEd, DTI, DA, DPWH, DOTr, ug DSWD nipasabot sa ilang mga prayoridad nga programa ug nakigbahin sa diskusyon bahin sa budget transparency.
Subay sa kamanduan ni Presidente Ferdinand R. Marcos Jr., gihatagan og gibug-aton sa forum ang pagpamuhunan sa edukasyon, panglawas, panginabuhian, ug imprastraktura.
Gitapos ang kalihokan pinaagi sa usa ka press conference aron pamatud-an ang pasalig sa gobyerno sa transparency, accountability, ug partisipasyon sa katawhan sa pagdumala sa nasud.
