Gibutyag sa Philippine Coast Guard (PCG) nga ang hiniusang pwersa sa mga awtoridad nakatala og inisyal nga ihap nga 35 ka mga patayng lawas nga nakuha gikan sa MV June Aster niadtong Biyernes, human gideklarar nga napalong na ang kalayo ug gihimo ang safety assessment.
Gideklarar nga napalong na ang kalayo sa MV June Aster mga alas-10:15 sa buntag niadtong Biyernes didto sa kadagatan sa Coron, Palawan.
Kahinomdoman nga nagsugod ang sunog pasado alas-6 sa gabii niadtong Miyerkules samtang ang barko anaa sa gilay-ong mga 2.2 kilometro gikan sa baybayon sa amihanan-sidlakang bahin sa Barangay Marcilla sa maong lungsod.
Gibutyag usab sa Philippine Coast Guard nga adunay nakit-an nga mga nangasunog nga patayng lawas sa bahin sa barko nga gitagana alang sa economy accommodation area atol sa usa ka safety assessment.
Ang PCG, PNP-SOCO, ug uban pang mga ahensya kasamtangang naglihok aron makuha ug mailhan ang maong mga patayng lawas subay sa tukmang mga pamaagi.
