CEBU – Gihandum sa dakbayan sa Sugbo ang National Flag Day karung adlawa pinaagi sa pipila ka mga aktibidad sa Plaza Independencia.
Gipasabut ni Bryner Diaz, OIC sa National Historical Commission of the Philippines, nga mandato sa tanang local government unit (LGU) nga handumun ang bandila sa Pilipinas isip pagtahud sa simbolo sa nasud.
Matud pa nga ang Philippine Flag ang simbolo sa pakigbisog sa mga Pilipino nga makab-ut ang kagawasan.
Subay niini, handumun sa dakbayan ang Cebu Heritage Week kung diin nakalatid kini sa ordinansa nga nagdeklarar sa katapusang semana sa Mayo sa paghatag ug pagtagad sa mga kabilin sa Sugbo.
Sugud kaganiha gipahigayun ang mga kinara-an nga duwa sama na lang sa kadang-kadang, sungka, takyan, ug uban pa.
Lakip na usab ang story-telling kung diin nagsaysay sa mga sugilanon sa Sugbo.
Samtang, gipasigarbo usab ni Cebu City Councilor Margot Osmeña nga giila ang Sugbo isip Asian City of Heritage niadtung 2011 hinungdan nga nanghinaut kini nga ipabilin sa mga Sugbuanon ang maong pasidungug.
