Misaad ang National Football League (NFL) sa pagtabang sa mga biktima sa dakong sunog sa Los Angeles, California.
Sumala sa usa ka pahayag nga gipagawas sa NFL, kini, kauban ang daghang mga koponan, maghatag $5 milyon aron suportahan ang mga komunidad sa LA nga apektado ug grabeng nakaangkon og kadaot sa nagpadayon nga mga sunog.
Kini nga kantidad naggikan sa hiniusang mga donasyon sa daghang mga team: ang Rams and Chargers, nga susamang nakabase sa LA, ug ang Minnesota Vikings ug Houston Texans.
Diin ang upat ka mga team matag usa modonar og $1 milyon ug ang NFL Foundation maoy motumbas niini.
Ang tabang ihatag sa Los Angeles Fire Department Foundation, nga nagtabang sa mga first responders sa dako nga sunog, ug sa American Red Cross, nga nagtabang sa mga apektadong residente.
Matod ni NFL Commissioner Roger Goodell, ang tabang kay pag-ila sa kabayanihan sa mga responders ug mga residente nga misuporta sa ilang mga silingan bisan pa sa hulga sa wildfire.
Gipasalig usab sa NFL nga magpadayon kini sa pagsuporta sa mga komunidad nga grabe nga naapektuhan sa dagkong mga sunog, kauban ang mga koponan sa tibuuk nga liga.
