WEST PHILIPPINE SEA-Kusganong gihimakak sa National Task Force West Philippine Sea ang pamahayag sa Chinese Foreign Minister nga gisakyan ug gisusi sa mga personahe sa Chinese Coast Guard ang barko sa Pilipinas nga nagpahigayon og resupply mission sa Ayungin Shoal.
Sa pamahayag sa National Task Force West Philippine Sea (WPS) dili gayud mangayo ang Pilipinas og pagtugot sa China ilabi na sa pagpahigayon og resupply missions sa Ayungin Shoal.
Basi sa report sa task force, makita ang presensya sa mga barko sa China nga naglakip sa upat ka Chinese Coast Guard ug tulo ka Peoples Liberation Army-Navy vessels ug duha ka Chinese Maritime Militia vessels.
Dili tinuod nga misakay sa barko sa Pilipinas ang Chinese Coast Guard personnel basi sa pamahayag sa Chinese Foreign Ministry.
Gumikan ang Ayungin Shoal kay low tide elevation ug dili sakop sa China’s sovereignty claims basi sa 2016 ruling sa Arbitral Tribunal tungod kay anaa kini sa exclusive economic zone sa Pilipinas.
Kini nagpasabot nga ang presensya sa Pilipinas sa nasangpit nga lugar legal nga nahiuyon sa internasyonal nga balaod, ilabi na sa UNCLOS.
