Gikumpirmar sa tigpamaba sa National Task Force on the West Philippine Sea (NTF-WPS) Rear Admiral Roy Vincent Trinidad ang plano sa gobyerno nga palawman pa ang relasyong militar niini sa Taiwan.
Matod ni Trinidad, aduna nay panaghisgot tali sa Pilipinas ug Taiwan aron i-regularize ang transit o pag-agi sa mga barkong iggugubat agi sa Taiwan Strait, ang dagat nga nagbuwag sa mainland Taiwan ug China.
Dugang niini nga ang maong lakang kabahin sa tinguha sa nasod nga mas molawom pa ang relasyong militar tali sa nasod ug Taiwan.
Mahimo usab kini nga maghatag og dalan alang sa umaabot nga pagsulod sa formal joint military activities tali sa duha.
Gituohan usab ni Trinidad nga mas subsob usab nga makita ang mga cross-strait transit sa mga barkong iggugubat sa Pilipinas ug Taiwan, ilabi na sa umaabot nga mga adlaw nga gipaabot nga pormal na kini.
Gikanayon sa Navy official, nga gusto sa gobyerno sa Pilipinas nga himuon kini nga long-term, ug dili lang temporaryo nga relasyon.
Sa pagkakaron, walay opisyal nga diplomatic ties tali sa Pilipinas ug Taipei tungod sa pabor ug pagsunod sa nasud sa polisiya sa One China.
