-- ADVERTISEMENT --

Giawhag ni National Bureau of Investigation (NBI) Director Melvin Matibag ang kampo ni Bise Presidente Sara Duterte nga magpasaka og pormal nga reklamo kalabot sa giingong mga hulga batok sa usa ka kanhi household staff sa Bise Presidente, lakip na ang pagpugos niini sa pagpirma og dokumento.

Nahitabo kini human nagpahayag si Atty. Paolo Panelo, tigpamaba ni Duterte, nga nakadawat ang Bise Presidente og mensahe gikan sa maong kanhi kawani—kinsa anaa sa Manila—nga nangayo og tabang ug pagluwas.

Matod ni Panelo, nadawat ang mensahe niadtong Nobyembre 16. Giingong nakalatid sa mensahe nga ang kanhi kawani gitago o kontrolado sa pipila ka mga indibidwal, kinsa naghulga sa iyang kinabuhi ug nagpugos kaniya sa pagpirma og dokumento—butang nga gibalibaran sa maong indibidwal.

Samtang, nagpahayag si Matibag nga kung tinuod ang hulga ug adunay tinguha nga ipaimbestigar ang insidente, angay nga modangop direkta ang kampo ni Duterte ngadto sa mga awtoridad.

Gipasiugda sa hepe sa NBI nga kung walay klaro nga dokumentasyon o ebidensya aron pagpamatuod sa mga alegasyon, ang maong hisgutanan maisip lamang nga “hearsay” o mga estorya-estorya. Dugang pa niya, wala pay nadawat ang iyang buhatan nga bisan unsang pormal nga reklamo kalabot sa maong insidente.

-- ADVERTISEMENT --