Gikompirmar sa National Bureau of Investigation (NBI) ang pagkasikop sa tulo ka mga tawo nga giingong sekretong nag-import og Uranium ug namaligya niini og ilegal dinhi sa nasod.
Matod sa mga otoridad, duha ka mga indibidwal nga sila si Mae Vergel Zagala alyas “Madam Mae” ug Arnel Gimpaya Santiago, nadakpan sa entrapment operation sa Pasay, City niadtong Oktubre 18, 2024 ug nakuhaan sila og 20 kilos nga metal ug 3 kilos nga black powder, nga tanan positibo sa Uranium-235 ug Uranium 238.
Pipila ka adlaw human sila nadakpan, nasikop sa Cagayan de Oro si Roy Vistal, kauban ni Zagala.
Kalabot niini, nadiskubrehan usab sa Philippine Nuclear Research Institute (PNRI) nga kontaminado sa Uranium powder ang dapit diin nadakpan ang tulo hinungdan nga kasamtangang gipaubos sa decontamination ang maong lugar una pa kini ablihan sa publiko.
Ang uranium usa ka matang sa bug-at nga metal nga mahimong gamiton sa paghimo og mga bomba ug mga taming.
Apan, adunay hulga sa kahimsog sa bisan kinsa nga naladlad sa kini nga klase sa metal.
Ang tulo nasikop tungod sa paglapas sa Republic Act No. 5207 o Atomic Energy and Liability Act of 1968.
