Wala pa’y giila nga person of interest ang National Bureau of Investigation (NBI) sa giingong kill order ni Bise Presidente Sara Duterte batok ni Presidente Ferdinand Marcos Jr., First Lady Liza Araneta-Marcos ug House Speaker Martin Romualdez.
Matod ni NBI Director Jaime Santiago, mao kini ang rason nganong gusto nilang makahinabi ang Bise Presidente aron iyang mapasabot ang iyang mga pamahayag niadtong Sabado nga gikonsiderar sa mga awtoridad nga hulga sa Presidente ug isyu sa nasudnong seguridad.
Kalabot niini, gi-serve na sa mga ahente sa NBI ang subpoena ngadto sa Office of the Vice President (OVP).
Nanghinaot ang kadagkoan sa NBI nga mosanong ang Ikaduhang Presidente kabahin sa iyang gisulti batok sa Presidente ug uban pa.
Ingon man nga wala na sila naglaum nga madungagan pa ang detalye o ibutyag ni VP Sara ang pagkatawo sa indibidwal nga giingong gikontrata sa pagpatay.
Samtang, kahinumdoman nga giklaro kaniadto ni VP Sara nga dili hulga ang iyang assassination statement apan mipadayag lang kini nga adunay hulga sa iyang seguridad.
