Nagpatawag ug emergency meeting kagahapong adlawa, Mayo 23 ang National Disaster Risk Reduction and Management Council (NDRRMC) aron hisgutan ang epekto sa pagpatuman sa restriction sa San Juanico Bridge sa pagsulod sa mga suplay sa probinsya sa Samar.
Ang maong panagtigom gipangunahan ni Office of Civil Defense (OCD) Administrator ug NDRRMC Executive Director Usec. Ariel F. Nepomuceno.
Ubay-ubay nga mga lakang o pamaagi ang gituki kung unsaon pagminus ang epekto sa gipatuman nga restriction, ilabina sa tibuok supply chain sa probinsya sa Samar ug unsaon pagtubag sa lokal nga kagamhanan niini.
Ang mga miapil nga ahensya nagplano kung unsaon pagpadayon ang pagsulod sa mga suplay bisan pa sa mga limitasyon sa routa, ug kung giunsa pagpadayon ang lig-on nga pamatigayon sa probinsya sa Samar bisan pa sa mga hagit nga dala sa gipatuman nga mga pagdili.
Pipila sa mitambong sa emergency meeting mao sila si Samar Gov Sharee Ann T. Tan, OCD Director Maria Agnes Palacio, Director Lord Byron S. Torrecarion sa OCD Region 8, ug mga representante sa Department of Interior and Local Government (DILG), Department of Public Works and Highways (DPWH), Philippine Coast Guard, Philippine Ports Authority, ug mga lokal nga kagamhanan.
Ang mga heavy truck nga motimbang og kapin sa tulo ka tonelada kay gidid-an sa pag-agi sa taytayan, dungan sa nagpadayon nga rehabilitasyon.
