Nipasalig sa publiko ang National Food Authority (NFA) sa Central Visayas alang sa lig-on ug igong suplay sa bugas nga makasuporta sa ‘Benteng Bigas, Meron Na!’ (BBM) program sa Department of Agriculture (DA), isip katumanan sa mahinungdanong saad sa kampanya ni Pres. Ferdinand R. Marcos Jr.
Mao kini ang gipasabut sa NFA procurement management officer IV ug acting regional information officer nga si Olma B. Nedia nga ang Republic Act No. 12708, o mas ilado nga Agricultural Tariffication Act of 2024, nagpadako sa mandato sa NFA sa pagsiguro sa rice buffer stocks ug pagsiguro sa food security.
Ubos niini nga balaod, ang NFA gimanduan nga maghupot og igong imbentaryo sa bugas aron sa panahon sa kalamidad o emerhensya andam kitang i-release sa mga kliyente.
Lakip sa mga nag-unang kliyente sa NFA mao ang Department of Social Welfare and Development (DSWD), Office of Civil Defense, ug ang mga local government units (LGUs) ilabina panahon sa relief operations.
Basi usab sa gikabutyag ni Nedia, ang DSWD maoy nag-una sa ilahang listahan kay ang maong buhatan, mao ang mopahigayon og relief operations, lakip na usab niini ang mga LGU ug ubang ahensya sa gobyerno sama sa Office of Civil Defense.
Gihatagan og gibug-aton ni Nedia nga ang giusab nga balaod nagpugong sa pag-import sa bugas ug nag-una sa lokal nga pagpalit gikan sa mga mag-uuma nga Pilipino sa tibuuk nasud, aron matagaan og bili ang mga lokal nga mag-uuma tungod kay didto gipalit ang suplay sa bugas. | Bombo Irene Ardiente
