Magsugod na ang National Food Authority (NFA) sa pagpalit og presko ug basa nga palay (fresh and wet palay) sa mas taas nga presyo sa Septyembre.
Sumala ni NFA Administrator Larry Lacson, ang mga lokal nga mag-uuma gilauman nga makakwarta og dugang kung ipatuman na ang bag-ong presyo, nga dungan usab sa pagsugod sa panahon sa pag-ani sa nasud.
Gikan sa kasamtangang P17 kada kilo, ang ahensya mopataas sa presyo sa pagpalit sa basa nga palay ngadto sa P21 kada kilo. Kini nagpasabot og dugang nga P4 kada kilo nga kita ug benepisyo para sa matag mag-uuma.
Bisan pa, giklaro ni Lacson nga kini nga programa limitado lamang sa mga lugar diin ang NFA adunay kaugalingong mga pasilidad sa pagpauga sa bugas.
Gipasabot sa opisyal nga ang maong mga pasilidad importante aron dali nga mamala ang magamit nga palay ug malikayan nga kini madaot o madunot samtang gitipigan sa mga bodega sa ahensya.
Sa pagkakaron, ang mga field office sa NFA sa lain-laing mga rehiyon nagpadayon sa ilang mga paningkamot sa pagpangita ug pag-coordinate sa magamit nga mga pasilidad sa pagpauga aron ang pagpalit og basa nga bugas mapatuman sa tibuok nasud.
