Target sa National Irrigation Administration (NIA) nga masumpay ang solar-powered pump irrigation project ngadto sa flood control projects sa Department of Public Works and Highways (DPWH) alang sa pagdumala sa tubig subay sa gusto ni Presidente Ferdinand Marcos Jr.
Atol sa 2025 post-SONA forum on Food Security and Economic Development, si NIA Administrator Engr. Eduardo Guillen nipahibawo nga ang NIA ug DPWH nakahuman na og pipila ka mga proyekto ug nagplano nga mopahigayon og inagurasyon aron ang publiko makakita ug makabenepisyo sa mga flood control projects alang sa food production.
Matod sa opisyal nga dali ra mahuman ang solar pump irrigation sulod lang sa upat ngadto sa unom ka buwan, busa mabati dayon ang epekto niini sa mga mag-uuma.
Apil sa solar-powered pump irrigation projects nga kabahin sa climate-smart irrigation agenda sa NIA chief mao ang Cabaruan SPIP sa Quirino Isabela, nga maoy pinakadako ubos sa maong proyekto. Ang solar project makatabang sa mga mag-uuma nga makadaginot tungod kay dili na kinahanglan nga mogasto pa og dako sa pagpalit sa mga produktong petrolyo.
Laing solar project sa maong ahensya mao ang Jalaur River Multipurpose Project – Stage II sa lungsod sa Calinog, Iloilo. Nag-alagad kini sa halos 32,000 ka ektarya nga yuta, nga nakabenepisyo sa 25,000 ka mga mag-uuma. Gawas sa irigasyon, ang nahisgutang proyekto makatabang sa pagpugong sa baha, power generation, ug pagpalambo sa pangisda ug turismo sa probinsiya.
Sa ikaupat nga state of the nation address ni Presidente Ferdinand Marcos Jr., iyang gitumbok ang kamahinungdanon sa dinagkong mga proyekto sa irigasyon ug ang paggamit sa renewable energy aron mapalig-on pa ang sektor sa agrikultura sa nasud.
