Gitabang ang 9-ka mga tawo nga mihatod ug hinabang alang unta sa naapektohan sa linog sa amihanang bahin sa Sugbo, apan inay sila ang mihatod ug hinabang, sila na hinouy gitabang kini human madisgrasya ang gisakyan niini nga pickup sa Barangay Cansumoroy lungsod sa Balamban, adlawng Dominggo, Oktubre 5.
Nakahiagom ug pipila ka mga samad sa kalawasan ang 9 ka mga tawo human nagdinumbolay ang duha ka mga sakyanan diin ang usa niini mohatod unta ug hinabang para sa naigo sa linog.
Nalambigit sa mao nga aksidente mao ang usa ka Xpander SUV nga gimaneho ni Ricky Ricafort Bustamante nga taga Barangay Aliwanay, Balamban samtang gimaniho usab ang usa ka pick up truck nga gimaneho ni Noe Kadilig Lindio, residente sa Kapagkulan, Barangay Tisa, Cebu City.
Base sa imbestigasyon sa mga kapulisan gikataho nga gadulhog ang duha ka mga sakyanan sa dulhogon nga bahin sa TCH nga nasakop sa Barangay Cansumoroy, Balamban sa diha nga nibangga ang pick up truck nga puno sa mga hinabang sa likod nga bahin sa SUV hinungdan nga mitikyaob ang SUV nga gimaneho ni Bustamante.
Samtang ang pick up truck milahos ug mibangga sa daplin sa dalan diin nalabay pa ang pipila ka mga sakay niini
Nakuha sa CCTV ang mao nga panghitabo ug dali ra usab nga gitabang ang mga sakay sa duha ka sakyanan og gidala sa doul nga Tambalanan.
Matud ni P/Lt Col Ruel Burlat, hepe sa Balamban PNP, brake failure ang gitudlo nga hinungdan sa maong aksidente diin nawad-an kini ug preno hinungdan sa pagkadumbol niini sa laing sakyanan.
CUE IN: P/LT COL RUEL BURLAT, Chief – Balamban PNP
Sa pagkakaron luwas usab ang kahimtang sa mga pasahero sa duha ka sakyanan samtang padayon ang pa usab ang imbestigasyon sa kapulisan.
Sa pikas bahin, aduna nay 3-ka kaso ang natala nga aksidente sa kadalan nga may kalambigitan sa mga mihatud ug hinabang padulong sa Amihanang bahin sa Sugbo.
