CEBU CITY- Nibisita ang National Nutrition Council (NNC) kang Cebu City Mayor Nestor Archival aron pagpasiugda sa mga enhanced nutrition policy ug mga programa alang sa dakbayan.
Gibuhat ang maong lakang tungod sa nagpadayon nga mga hagit sa nutrisyon nga giatubang sa Sugbo, ilabi na nga mao kini ang sentro sa Central Visayas nga daghan og populasyon.
Atol sa courtesy visit, giawhag sa NNC ang kagamhanan sa dakbayan nga palig-onon ang mga inisyatibo sa nutrisyon pinaagi sa pagkuha og full-time nga nutrition action officer, pag-operate sa NutriVan, ug pagpatuman sa nutrition-sensitive programs.
Ang gisugyot nga “Kitchen on Wheels” nga NutriVan nga proyekto magtanyag og container gardening, cooking demonstrations, dietary consultations, mothers’ classes, feeding programs, ug bisan ang food ambulance services panahon sa mga emerhensya.
Subay niini, si Mayor Archival nipadayag og suporta sa mga rekomendasyon sa konseho, nihatag og gibug-aton sa kamahinungdanon sa hiniusang paningkamot aron maseguro ang hustong nutrisyon sa mga residente sa dakbayan sa Sugbo.
