CEBU CITY-Gitino sa Department of Health (DOH-7) nga wala pa’y travel restriction sa Central Visayas sa tanang parte sa nasud nga China.
Kini gumikan kay wala pa’y abiso gikan sa World Health Organization (WHO) kung diin nagdepende usab kini kung unsa na kalapad ang transmission sa N-Corona Virus.
Sa press conference sa DOH-7, giingon ni Dr. Van Philip Baton, ang medical officer sa Center for Health Development nga kinahanglang nahisubay usab ang himoon nila nga lakang sa ebedinsya’ng ilang makuha.
Kini subay na usab sa ilang pakig-alayon sa International Airport sa Cebu ug Bohol Province kung diin nasuta nga tungod kay dako ang nasud nga China ug dili pa usab lapad ang transmission sa naasoy nga sakit, lisod nga magpatuman og travel restrictions.
Bisan paman, hugot nga mipatuman sa ilang advisory ang ahensya nga kinahanglang magsul-ob na og mask. Ug sa mga nataptan sa Corona Virus symptoms apan wala’y travel history sa Wuhan, China, kinahanglang magpuyo nalang sa ilang panimalay.
Igo na matud pa ang thermal scanner sa mga entry points sa rehiyon samtang gipaabot ang abiso sa international agency.
