CEBU CITY – Gihimug-atan ni Cebu City Mayor Michael Rama nga dili niini angayan nga ilibkas ang iyahang giluwatan nga Executive No. 5.
Matud pa, klaro sa iyahang EO nga “non-obligatory” ang pagsul-ob ug face mask, ug wala kini nga nagpasabot nga gihimo kining “mandatory”.
Giingong wala’y makabuot sa usa ka tawo kung ganahan kini nga magsul-ob ug face mask o dili na.
Gipahibalo ni Rama nga nagpaabot pa kini sa input sa iyahang mga abogado kung unsa ang ilahang buhaton subay sa hangyo ni DILG Secretary Benhur Abalos nga dili una ipatuman ang naasoy nga executive order.
Sigon pa, ilahang lantawon kung dili kini sukwahi sa ‘local autonomy’, ingon man kung dili usab kini sukwahi sa iyahang papel isip local chief executive, arun nga lingkoran ug istoryahan.
Giangkon usab sa mayor nga wala kini maka-uyon sa pamahayag sa Department of Health nga gikinahanglan pa kini nga mo konsulta sa ahensya una nga muluwat sa naasoy nga kamandoan.
Nagkanayon si Rama nga sa maong EO, iyaha lang gipatuman ang full autonomy sa usa ka LGU ingon man ang full decentralization.
