Gipangunahan ni North Korean leader Kim Jong Un ang pagsulay sa usa ka weapon system, nga gipasigarbo niini isip ebidensya sa naga-abante nga teknolohiya sa militar sa maong nasod.
Ang maong pahibalo gihimo duha ka adlaw human gibutyag sa South Korea ug Japan nga nagpadala ang Pyongyang og duha ka short-range ballistic missile ngadto sa kadagatan sa sidlakang baybayon niini.
Gitaho sa Korean Central News Agency (KCNA) ang malampusong pagsulay sa pagpabuto sa bag-ong sistema sa armas ubos sa direktang pagdumala ni Kim, bisan pa man nga wala gitino sa Pyongyang ang matang sa sistema nga gisulayan.
Nagpasidaan usab ang lider sa North Korea nga kining pag-uswag sa militar maghatag og dako ug lisod sulbaron nga problema ug maghatod og pait ug ”unavoidable blow” ngadto sa ilang mga kaaway.
Nahitabo ang pagsulay walo ka adlaw human naglusad ang North Korea og pipila ka short-range ballistic missiles ngadto sa East Sea isip kabahin sa usa ka hiniusang firepower drill.
Bisan pa sa mga pagsaway gikan sa Seoul ug Japan, nga nagpadayag og kusog nga protesta tungod sa paglapas sa mga resolusyon sa UN Security Council ug sa hulga niini sa kalinaw sa rehiyon, wala gayud magpadani o moundang ang North Korea.
Bag-o lang usab nga gisalikway sa nasud ang usa ka resolusyon sa International Atomic Energy Agency (IAEA) nga nanawagan alang sa paghunong sa mga kalihokan niini nga may kalabotan sa nukleyar.
Isip depensa sa baruganan sa nasud, si Kim Yo Jong, ang impluwensyal nga igsoon ni Kim Jong Un, mipahayag nga ang estado sa nasud isip usa ka gahom nga adunay armas nukleyar kay permanente ug nakalatid sa balaod, samtang gitawag niya nga mga “fool” ang mga tawo nga naglaom nga bungkagon ang mga kapabilidad niini sa nukleyar.
