CAMARINES SUR – Walay swerte nga nasakpan ang usa ka lalaki nga giingong kawatan human nga nangawat sulod sa usa ka panimalay sa lungsod sa Bato, Camarines Sur tungod lang sa iyang ilhanan nga mao ang iyang tattoo.
Sa CCTV footage nga nahipos sa Bato Police Station, makita nga nagdali-dali sa pag-ikyas ang maong kawatan pinaagi sa pag-agi ngadto sa bintana sa dihang natagak ang iyang gi-ablihan nga drawer.
Nahimong ninja moves ang nilihokan sa maong kawatan diin mikatkat pa kini sa bintana aron makasulod sa panimalay.
Hinay-hinay ug adunay kwentada ang iyang mga nilihokan kung mahulagway. Gani, gitabunan ang iyang nawong sa dihang nakakita kini og CCTV camera.
Apan dali-dali nga mihawa ang maong lalaki sa dihang iyang gitagak ang drawer nga iyang gi-ablihan.
Nadala sa notadong kawatan ang duha ka relo ug usa ka cellphone.
Sa follow-up operation sa Bato Police Station, nasikop ang suspek nga si Noel Camposano tungod lang sa ilhanan nga nakita sa CCTV, nga mao ang iyang patik sa likod.
Nasayran nga nabalhog kaniadto sa prisuhan si Camposano tungod usab sa kasong pagpangawat.
Nasakmit sa kapulisan ang kinawat nga mga relo ug cellphone.
