Giila sa Office of the Civil Defense (OCD) ang mga programa nga naapektuhan sa pagsuspinde sa foreign aid sa Amerika.
Sa memorandum order nga giluwatan ni OCD administrator USec. Ariel Nepomuceno, Assistant Secretary Bernardo Rafaelito Alejandro IV, OCD deputy director for administration, ug deputy administrator for operations Assistant Secretary Cesar Idio ang gitahasan sa pag-ila ug pag-imbestigar sa mga proyekto nga mahimong maapektuhan sa direktiba ni US President Donald Trump.
Ang opisyal nagpahayag nga ang OCD nagtahod sa mga pahayag sa kasamtangang administrasyon sa Amerika.
Girekomendar usab ni Nepomuceno ngadto sa nahisgutang mga opisyal ang mga lakang alang sa pagpadayon sa pagpatuman sa mga proyekto ug pagsiguro sa tukma sa panahon ug episyente nga pagpatuman sa matag inisyatiba.
Kung kahinumdoman, dako og natabang ang Amerika sa mga katalagman nga miigo sa Pilipinas apil na niini ang paghapak sa Bagyong Kristine niadtong Oktubre sa miaging tuig, diin ang gobyerno sa US nihatag og P84 milyones aron suportahan ang mga relief efforts sa PH ug sa US Agency for International Development (USAID)-Philippines aron matabangan ang mga komunidad nga grabeng naapektuhan sa rehiyon sa Bicol ug Batangas nga makabangon.
