Gitun-an sa Office of Civil Defense (OCD) ang pagpalapad sa expanded Permanent Danger Zone (PDZ) palibot sa bulkan sa Kanlaon.
Kini tungod usab sa gikahadlokang hulga sa lahar flow dala sa nagkadaiyang weather systems nga nagdala og kusog nga uwan sama sa kanhi bagyong ‘Querubin’ nga nibalik sa pagka Low Pressure Area (LPA).
Matod pa sa Task Force Kanlaon, plano nila nga ibalhin ang mga evacuation center duol sa 6-kilometer PDZ sa 10 km radius, ug 14 km radius.
Dugang pa sa TF, ilang gilikayan ang pagdagayday sa lahar duol sa mga bakwit; kon mas layo sila sa bulkan, mas layo sila sa kapeligrohan niini.
Sa pagkakaron adunay 29 ka evacuation centers sa Negros Islands samtang napulo usab ka mga pamilya ang mipili sa pagbutang og ilang kaugalingong mga tolda.
Ang TF nakaabot usab sa 100% nga pagbakwit sa mga residente sa PDZ.
Sila adunay kinatibuk-ang gidaghanon nga 18,475 ka tawo o anaa sa 5,772 ka pamilya.
Matod pa usab sa The Philippine Institute of Volcanology and Seismology (Phivolcs), ang hulga sa kalit nga pagbuto sa Kanlaon volcano nagpabilin bisan unsang orasa.
Gibase usab kini sa padayon nga kalihokan sa bulkan, kasagaran natala nga mga linog sa bulkan.
