Nipirma ang Office of Civil Defense (OCD) og duha ka kasabotan aron palig-onon ang disaster preparedness sa Isla sa Negros, human sa pagbuto sa Kanlaon Volcano niadtong Abril 8 nga mipabakwit sa kapin sa 25,000 ka mga residente.
Diin ang unang kasabutan tali sa OCD ug sa Lungsod sa Victorias, nga nagtumong sa pagpalig-on sa disaster risk reduction and management (DRRM) sa siyudad pinaagi sa pag-access sa training, technical resources, ug scientific data gikan sa OCD.
Samtang ang ikaduhang kasabutan gipirmahan uban sa Negros Association of Chief Executives (ACE) pinangulohan ni Victorias Mayor Javier Miguel Benitez, aron mapalapad ang inisyatiba sa tibuok Negros Occidental.
Matud ni OCD Administrator Ariel Nepomuceno, ang Kanlaon kay usa sa 24 ka aktibo nga bulkan sa nasud, ug kasamtangang gipangandaman ang posible nga mga linog.
Dugang pa niini nga makatabang pinaagi sa paghatag og kahibalo ug datos gikan sa lokal ug internasyonal nga mga ahensya.
Gipunting usab sa kasabutan ang pag-ugmad sa usa ka summit sa DRRM ug usa ka mas hiniusang balangkas sa kalig-on sa katalagman alang sa Negros.
Gipasalig ni Nepomuceno ang padayon nga suporta sa nasudnong kagamhanan ngadto sa mga lokal nga kagamhanan panahon sa kalamidad.
