CEBU CITY-Gimando sa Officer-In-Charge sa Cebu City Police Office nga si Police Col. Antonietto Cañete nga ipaubos sa ikaduhang eksaminasyon ang patayng lawas ni Charina Relativo kinsang gipatay sulod sa iyang giabangan sa Bulacao ning dakbayan sa Sugbo.
Tumong niini arun masigurado nga wala gayud kini gitamastamasan sa wala pa kini gipatay.
Ang desisyon sa Acting Director nunot sa resulta sa gipahigayon nga autopsy nga nag-negatibo kini sa pagpanglugos apan, nasayran nga expired na ang nagamit nga test kit sa crime lab.
Kahinumduman nga giangkon na sa suspek nga si Darren Alderson Cui nga napatay niini ang biktima ug planong sunogan arun itago ang iyang nabuhat nga krimen apan, wala kini nagmalampuson.
Gikanayon usab ni Cañete nga gawas sa illegal of possession of Firearms, ila na usab gipasaka ang kaso nga murder ug arson batok sa suspek.
Ingon man nga mipasalig ang opisyal nga lig-on ang mga gipasaka nga kaso kang Cui pinaagi sa mga ebidensya ug affidavit nga nakuha gikan sa suspek.
