Nakaandam ang Office of the Ombudsman nga mohatag og proteksyon sa kanhi Representante sa Ako Bicol Partylist nga si Zaldy Co human siya mipadayag og kahadlok sa iyang kinabuhi.
Sa unang video ni Co nga gipagawas niadtong Biyernes, iyang gibutyag nga sa dihang hapit na siya mobalik sa Pilipinas, gitawagan siya sa kanhi House Speaker nga si Martin Romualdez ug giingnan nga dili na mobalik sa nasud ug gihulga nga patyon siya kon mosulti siya batok kanila. Giingon usab ni Co nga gigamit siya isip paon sa kampanya sa administrasyon batok sa korapsyon.
Sa usa ka pamahayag niadtong Sabado, Nobyembre 15, gipasiugda sa Ombudsman nga “ang kaluwasan sa usa ka saksi hinungdanon sa pagpangita sa kamatuoran.”
Miingon usab siya nga dugay nang abli ang Ombudsman sa kanhing magbabalaod sa pagpresentar sa iyang ebidensya ug kon miingon siya nga ang kahadlok ang hinungdan sa iyang paglikay, gipasalig siya sa Ombudsman nga hatagan siya og proteksyon.
Wala mouyon ang Ombudsman sa paagi sa pagpresentar ni Co sa iyang bahin pinaagi sa pagpagawas og video imbes nga mohatag og pamahayag sa opisina. Busa, miingon sila nga ilang susihon pag-ayo ang mga gibutyag ni Co kay ang tanang saksi kinahanglan nga moagi niini.
Bisan og iyang giangkon nga usahay hinay ang proseso, iyang giingon nga kini ang paagi aron masiguro nga lig-on ang hustisya ug dili lang pangagpas.
Sa katapusan, giawhag sa Ombudsman si Co nga mopauli, mosumite sa iyang pamahayag, ipa-verify ang iyang mga pamahayag ug moagi sa parehas nga proseso nga giagian sa tanan.
