Misang-at og omnibus motion sa Senate Ethics Committee si Atty. Eldrige Marvin Aceron, nga nag-alegar og “transactional” nga relasyon tali ni Sen. Francis “Chiz” Escudero ug sa kontraktor nga si Roberto Lubiano sa wala pa ang paglingkod sa magbabalaod isip gobernador sa Sorsogon gikan sa 2019 hangtod 2022.
Matod ni Aceron, samtang si Escudero gobernador sa Sorsogon, nakadaog og kontrata sa gobyerno ang Metroways Healthcare and Medical System ni Lubiano niadtong 2021.
Samtang gikan sa Disyembre 2021 hangtod Mayo 2022, nihatag daw kini og P30-milyones sa kampanya ni Escudero pagka senador.
Gikan sa 2022-2025, nakadaog usab ang Centerways Construction og P16.67-bilyones sa mga kontrata sa Department of Public Works and Highways (DPWH) nga nakatutok sa Sorsogon.
Gitataw ni Aceron nga dili igo nga due diligence ubos sa RA 6713 ang pangangkon ni Escudero nga nakadawat og mga donasyon base sa “friendship”.
Sumala sa mosyon, kinahanglang ipasabot ang P35.07-milyones nga accounting discrepancy sa SEC filings sa Centerways Construction.
Gihangyo usab niya ang Senate Ethics Committee nga paspasan ang referral sa reklamo batok kang Escudero, subpoena ang financial records sa duha ka kompanya, lakip ang personal financial records ni Lubiano, BIR records nga nagpakita sa dividend declarations ug shareholder transactions, ug records sa Provincial Government of Sorsogon gikan 2019-2022 nga nagpakita sa kontrata nga gihatag sa duha ka kompanya ni Lubiano.
Gihangyo usab niya nga ipahigayon ang usa ka pagdungog aron mahibaw-an ang mga potensyal nga paglapas.
Gipasiugda ni Aceron ang panginahanglan sa pagkadili-mapihigon sa proseso sa ethics complaint.
