CEBU – Gikinahanglan na ang pag-‘revise’ o pag-usab sa Revised Omnibus Revenue Code sa dakbayan arun sa pagpatuman sa bag-ong buhisan.
Gipasabot ni Cebu City Councilor Noel Wenceslao, ang chairman sa Committee on Budget and Finance, nga sulod sa 16 ka tuig wala gayud maka-usab ang dakbayan sa revenue code hinungdan nga panahon na arun kini usbon ug ipatuman ang 400% nga pagsaka sa buhisan.
Matud pa, usa ang pag-revise sa ‘omnibus tax code’ nga basihan sa pagkab-ot sa budget nga tinguha ni Cebu City Mayor Mike Rama alang sa ambisyon nga Singapore-like Cebu City.
Sigon sa konsehal, sa maong katuyoan, nagkinahanglan gayud ug igong pondo ang dakbayan sa Sugbo alang sa mga programa ug proyekto nga buot ipatuman sa mayor.
Hinuon, gitataw ni Wenceslao nga ilahang siguradohon nga ang pag-aprobar sa ‘2022 Revised Omnibus Revenue Code of the City of Cebu’ kay dili mahisusama nga ‘excessive’ ug ‘oppressive’ arun nga dili usab mabug-atan ang katawhan.
Nanghinaut usab ang konsehal nga mahuman ang ilahang pagtuki sa tax revision sa konseho sa dili pa mahuman ang tuig 2022.
