CEBU CITY-Dili matud pa angayan nga buhisan ang ‘online barter’. Kini ang pamahayag sa usa ka manlalaban nga si Atty. Jerry Carillo sa dihang nahinabi sa Bombo Radyo Cebu atol sa tulumanong Dura Lex Sed Lex.
Kini subay usab sa kontrobersiya karon sa naumol nga online barter nga ‘patok’ kun nasikat na karon sa social media, diin magbinalo-ay ang matag usa sa ilang mga item o butang nga walay na-involve nga kwarta, butang usab nga giigon sa Department of Trade and Industry (DTI) nga angayan kining buhisan ug kini iligal.
Gipahibalo sa abogado nga ang ‘barter’ mao lamang ang pagbinaylo-ay og item ug walay nakaginansya sa duha ka habig nga nagbinayloay hayan dili kini mamahimo nga buhisan.
Ang ideya matud pa sa buhis, mao nga kung ang usa ka tao makaginansya pinaagi sa usa ka transaksyon o negosyo, ang gobyero mubuhis usab sa ginansya niini.Apan sa natad sa ‘barter’ walay nalambigit nga kwarta hayan dili na kini angayang buhisan.
Gihimug-atan ni Carillo nga dili na angayan matud pa nga lisod-lisoron pa ang publiko. Taliwa matud pa sa pandemya nangita nalang ang katawhan og paagi nga makasurvive ug ang barter ang usa sa nakita niini nga paagi.
Dugang pa sa manlalaban nga ang angayang pokosan mao ang ‘deficiency’ o kakuwang sa buhis gumikan sa mga tax evaders. Kini matud pa ang angayang gukdon ug dili dagitonon ang online barter.
