Gisignit sa mga otoridad ang dili mominos 12 ka mga motorsiklo nga adunay modified mufflers, o mas nailhan nga “bora-bora,” atol sa gipahigayong operasyon karong adlawa, Pebrero 27, didto sa Barangay Jagobiao, Dakbayan sa Mandaue, Sugbo.
Ang maong operasyon hiniusang gipasiugdahan sa Traffic Enforcement Agency of Mandaue (TEAM), Land Transportation Office (LTO), Highway Patrol Group (HPG) ug sa Traffic Enforcement Unit (TEU).
Tumong niini nga mas pakusgan pa ang pagpatuman sa balaod batok sa mga saba nga tambutso nga makadisturbo sa publiko. Gawas sa mga motorsiklo, nakuha sab sa mga otoridad ang usa ka “tura-tura” nga duna puy modified muffler, samtang usa ka tricycle ang gi-impound tungod sa pagbiyahe sa highway nga walay valid nga prangkisa.
Matud pa ni TEAM head Hyll Retuya atoll sa pakighinabi sa mga sakop sa tigbalita, ang ilang walay hunong nga operasyon nakatabang og dako sa pagpaanindot sa dagan sa trapiko ug pagminus sa kasaba sa mga dagkong dalan.
Ingun man nga dugang pamulong niya, nahimuot kini nahinay-hinayan nag sabot sa mga katawhan ang maong kalihokan, dungan sa pagpasabot nga ang maong lakang nahiuyon sa kasamtangang nasudnong balaod.
