CENTRAL VISAYAS-Gibutyag ni COMELEC-7 Director Francisco Pobe nga ang ‘Operation Baklas’ kay gikatakda karong Pebrero 13 ug 14 diin maglangkob sa campaign materials nga nakitang gibutang sa mga pasilidad nga gipanag-iya sa gobyerno ug sa mga national highway o gawas sa common poster areas.
Ang matangtang mao ang mga poster sa mga kandidato sa pagka-senador ug partylist.
Matud ni Pobe nga ning sayo pa, daghan nang campaign materials ang makita sa nagkalain-laing lugar sa rehiyon hinungdan nga nidugang ang ilang tinguha sa pagtangtang niini.
Ingon man nga aduna sila’y exemption nga himuon diin dili nila tangtangon ang mga materyales sa propaganda nga gibutang sa mga pribadong gipanag-iya nga mga kabtangan ug mga pinuy-anan.
Apan, sa dili pa sila magsugod sa ilang “Operation Baklas” nga mga notisya ipadala ngadto sa mga hingtungdan nga kandidato ug partylist groups aron hangyoon nga boluntaryong tangtangon o ibalhin ang ilang campaign materials ngadto sa gitudlo nga common poster areas.
