CEBU CITY- Gipasakahan na og kasong kriminal ang upat ka mga indibidwal nga giilang nalambigit sa scam hub nga gioperahan sa I.T. Park, Lahug, Cebu City, base sa resulta sa halapad nga cyber investigation pagkahuman sa insidente niadtong Marso 20, 2025.
Sa pahayag nga gipagawas sa Police Regional Office 7 (PRO7), pormal nga gisang-at ang reklamo batok kang alyas “Tonying”, residente sa Lahug, Cebu.
Gitumbok siya nga operator sa scam hub ug giatubang niya ang mga kasong kalapasan sa Section 8 ug 28 sa RA 8799 (Securities Regulation Code), ug Section 11 (Investment Fraud) sa RA 11765 (Financial Products and Services Consumer Protection Act), nga pareho nga adunay kalabutan sa Section 6 sa RA 10175 (Cybercrime Prevention Act).
Sa laing bahin, niadtong Hulyo 11, 2025, tulo pa ka mga indibidwal nga gitawag sa alyas nga “Lerang,” “Yan-yan,” ug “Jeje”, nga mga residente sa Balamban, Compostela, ug Cebu City, gipasakaan usab og kaso ilawom sa Section 11 sa RA 11765 nga adunay kalambigitan sa Cybercrime Prevention Act.
Matud ni Police Brigadier General Redrico A. Maranan, Regional Director sa PRO7, nga layo pa ang imbestigasyon sa maong scam operation, apan ang pagsaka og kaso batok sa mga suspek usa ka dakong kalampusan sa paningkamot sa kapulisan nga mabungkag ang mga scam network nga nanamastamas sa kahuyang sa publiko sa pinansyal nga aspeto.
Padayon usab ang mga imbestigasyon aron mahibal-an ang dugang pang mga tawo nga nalambigit sa operasyon.
Una na nga nakita sa CCTV footage nga ang mga suspek aktibo nga nag-apil sa kalihokan sa maong kompanya.
Ang mga imbestigador karon nagtrabaho sa pag-ila sa ilang digital nga identidad ug personnel records alang sa angay nga legal nga mga lakang.
Kon makonbikto, ang mga suspek posible nga mag-atubang sa silot nga hangtod sa 21 ka tuig nga pagkabilanggo ug multa nga hangtod sa ₱5 milyon, depende sa gidaghanon ug kabug-aton sa mga kaso nga ilang giatubang.
