CEBU CITY – Gikadismaya sa mga office staff sa bag-ung napili nga konsehal sa dakbayan sa Sugbo nga si Cebu City Councilor Niña Mabatid ang ilahang naabtan nga opisina gumikan kay susamang giguba usab kini.
Gibutyag ni Connie Madarang nga gitangtang ang mga cabinet, kahoy sa bongbong, ingun man ang mga electrical wirings.
Matud pa nga dili pa gayud nila mapahimuslan ang maong opisina gumikan kay hugaw ug gikinahanglang pang panindutun ug balik.
Makita usab nga giguba lakip na ang kuptanan sa hagdanan paingun sa maong opisina.
Nasayran nga ang nahisgutang opisina ang gigamit kaniadtu sa kanhi konsehal nga si Mary Ann Delos Santos kinsang runningmate sa kanhi mayor nga si Tomas Osmeña niadtung nakalabay nga eleksyon
Sa pagkakarun, gilimpyuhan una sa mga staff ni Konsehal Mabatid ug giingung panindutun na lang una nila ang nahisgutang opisina.
Samtang, magpadayun ang pagka-mayor ni Cebu City Mayor Edgardo Labella bisan pa man ug wala kini opisina.
Kini pamahayag sa mayor subay sa unang adlaw niini sa iyahang pangatungdanan sa dakbayan sa Sugbo.
Matud ni Mayor Labella nga gikinahanglan nga magpabilin kini nga lig-un ug magpadayun sa iyahang mga serbisyo sa publiko.
Gipahimangnuan usab niini ang mga empleyado nga dili maghimu ug bisan unsa mang kahiwi-an ug sundun ang nakalatid sa Code of Ethics.
Gipahibalu usab niini nga aduna unya’y mga serye sa random drug testing sa tanang mga opisyal ug mga empleyado sa City hall ug si kinsa man kadtung mag-positibo hayan ipaagi usab kini sa insaktu nga proseso sa balaud.
Nagkanayun si Labella nga mahimu kining ‘flexible’ sa istilo sa iyahang pagdumala apan kung baruganan ug prinsipyo na ang hisgutan, giingung magpabilin kining ligdung.
