CEBU CITY – Gisugdan na sa pagpatuman sa kapulisan sa dakbayan sa Sugbo, uban sa mga representante sa buhatan sa Commission on Elections (Comelec) sa dakbayan, ang ‘Oplan Baklas,’ o ang pagtangtang sa mga illegal campaign materials, niadtong adlawng Miyerkules, Pebrero 16, 2022.
Tumong sa Oplan Baklas ang pagsiguro nga ang tanang campaign materials sa mga kandidato mabutang sa designated areas.
Apan, sa paghimo niini gikinahanglan sa kapulisan ang giya ug direktiba gikan sa north ug south district offices sa Comelec sa pagpahigayon sa Oplan Baklas.
Matod pa ni Police Lieutenant Colonel Maria Theresa Macatangay, information officer sa Cebu City Police Office (CCPO), nga ang Comelec ray adunay katungod sa pagdesisyon kung unsa nga campaign materials ang nakalapas sa mga rekisitos nga gitakda.
Ug sa pagpahigayon niini gikinahanglan ang mga representante sa Comelec mo-uban sa kapulisan atol sa pagpahigayon niini.
Butang nga gikompirmar usab ni Raqual Arce, ang pangu sa Prevention Restoration Beautification and Enhancement (PROBE), nga lakip ang ilahang grupo sa pagpanangtang sa mga poster nga nakitaan og kalapasan.
Ubos sa Fair Elections Act,Section 9, o ang Posting of Campaign Materials,mahimong tugotan sa Comelec ang mga partido politikal sa paghimog poster areas sa labing taas nga 10 ka pampublikong lugar, nga mao ang mga plaza, merkado, barangay centers, ug uban pa.
Gikinahangan usab nga mosunod sa gidak-on sa mga poster nga mga dapit nga dili molapas sa 12 sa 16 ka mga tiil o 12 by 16 feet.
Una nang giangkon sa CCPO nga nilaum kini sa usa ka malinawon nga 2022 election kini human usab gibutang sa “category green” ang syudad nga nagpasabot nga walay dakong kabalaka sa seguridad sa umaabot nga piniliay.
