CEBU – Gipirmahan ni Cebu City Mayor Michael Rama ang Executive Order No. 13 o Oplan Likay sa Landslide gahapon Huwebes, Nobyembre 3, 2022, alang sa pagpugong, pagpaminus, pagkaandam, pagtubag, rehabilitasyon,ug Pagdumala sa mga Insidente sa Landslide ug Landslide Prone nga mga Lugar sa Dakbayan sa Sugbo ug Paghimo og Espesyal nga Task Force alang sa Katuyoan.
Kini gumikan sa pagdahili sa yuta nga niigo sa Sitio Garahe sa Barangay Busay, dakbayan sa Sugbo niadtong Sabado, Oktubre 29, 2022.
Ang maong kamandoan ang gipasabut ni Mayor Rama, pinaagi sa pagbasa sa iyang assistant nga si Attorney Collin Rosell.
Kung diin gimandoan ni Rama ang Cebu City Disaster Risk Reduction and Management Office, City Planning and Development Office, Department of Engineering and Public Works, Office of the Building Official, Department of Social Welfare and Services ug ang Department of the Interior and Local Government, sa koordinasyon sa mga opisyal sa barangay, nga mohimo dayon og imbentaryo sa tanang istruktura/drainage system nga gitukod sulod sa 30 ka bukirang barangay nga gitino sa Mines and Geosciences Bureau Central Visayas nga taas nga delikado sa pagdahili sa yuta sugod sa Barangay Banilad, Budlaan, Busay, Babag, Bonbon, Malubog, Pung -ol Sibugay, Sirao, Pulangbato, Guba, Mabini, Binaliw, Agsunog ug Sinsin.
Gitahasan sa mayor ang nagkalain-laing buhatan sa paghimo og intensive information, education ug communication drive sa mga apektadong komunidad.
Base sa EO, kinahanglang bakantehan ang mga estraktura nga ilegal nga gitukod sa mga lugar nga gitino sa Special Task Force nga gipangulohan ni Attorney Collin Rosell nga delikado kaayo sa pagdahili sa yuta.
