Gikabutyag ni Abosamen H. Matuan, ang Regional Director sa Land Transporation Franchising and Regulatory Board-7 (LTFRB-7) nga sugdan na nila sunod semana ang pag implementar sa “Oplan Semana Santa.”
Atol sa pakighinabi niini sa mga sakop sa tigbalita, gipasabot ni Matuan nga ang maong lakang susama ra usab sa naandan nga mga pamaagi, diin pipila palang sa semana sa dili pa ang obserbasyon sa Semana Santa, nag-andam na ang maong buhatan.
Gitino ni Matuan nga lakip sa ilang pagabuhaton mao ang pagdu-aw sa matag terminals alang sa pagsusi sa kaandam sa terminal, ug ingun man pag-inspeksyon sa matag pasilidad.
Gawas niini, lakip usab sa ilahang pagabuhaton mao ang pagpang inspeksyon aron masuta usab kung road-worthy paba kini, tungod kay matod pa, dili mabutang sa risgo ang kahimtang ug conveniency sa mga pasahero.
Samtang, gitino usab ni Matuan nga gawas niadtong mga napaambit nga lakang subay sa obserbasyon sa Semana Santa, apil usab niini ang pagpang-isyu sa LTFRB-7 og special permit sa mga pipila ka mga sakyanan nga ni-apply og special permit aron aron mag-cater sa nagkadaiyang rota.
Ingun man iya usab nga gipaambit nga adunay daily monitoring ang buhatan sa matag terminal, aron kini mahimong sumbanan nila kung unsa pa ang mga rota nga nagkinahanglan og dugang nga unit.
