CEBU CITY – Gisiguro ni Cebu City Mayor Edgardo Labella nga gitutokan sa City Government kauban ang Cebu City Police Office (CCPO) ang seguridad alang sa nagsingabot nga Sinulog Festival 2020.
Matud ni Mayor Labella nga ilahang gibuhat karun ang tanan arun nga masiguro ang kaluwasan sa tanan, dili lang sa mga Sugbuanon inay lakip na ang lokal ug langyaw turista.
Sigon pa sa mayor nga ilahang paningkamutan nga malingaw ug luwas ang tanan sa nahisgutang kasaulogan.
Samtang, gipadaplin lang ni Mayor Labella ang giingong mga negatibo nga komento sa ilahang gihimo karun nga preparasyon diin giingong dili kini makatabang.
Gihimug-atan niini nga mas maayo na ang ‘over prepared’ inay nga magkumpyansa.
Kini subay na sa wala’g tuo nga komento kalabot sa subling pagpatuman ug ‘signal shutdown’ atol sa nahisgutang kasaulogan.
Gibutyag ni Mayor Labella nga mas maayo nga tutokan na lang niini ang iyahang trabaho kauban ang CCPO sa pagpangulo ni Police Colonel Engelbert Soriano, inay nga paminawon ang pulos na lang negatibo nga komento.
Gipasabot sa mayor nga kung unsa man ka hugot ang seguridad nga gipatuman giingong alang lang usab kini sa kaluwasan sa tanan.
