Nagpahigayon ang Office of the Vice President (OVP) og usa ka “Pop-Up Exhibit” sa Sugbo niadtong Martes, Hulyo 21, 2026, isip kabahin sa pagsaulog sa ika-90 nga anibersaryo sa institusyon sa Bise Presidente sa Pilipinas.
Wala man nakatambong ang Bise Presidente tungod sa ka-puliki sa iyang eskedyul, nagpadayon gihapon ang kalihokan nga nagpakita sa mabulukong kasaysayan sa maong buhatan sugod sa pagkatukod niini ubos sa 1935 Constitution, lakip na ang mga kanhi Bise Presidente ug ang ilang nabilin nga legasiya sa nasod.
Subay niini, gipasabot ni Atty. Connie Lim, Lead sa OVP Cebu, Bohol, ug Siquijor Satellite Office, nga tumong sa exhibit ang pagpalalóm sa kahibalo sa publiko, labina sa mga kabatan-onan, kabahin sa kritikal nga papel sa Bise Presidente sa pagdumala ug kasaysayan sa Pilipinas.
Gipahayag usab ni Lim nga bisan pa sa mga hagit nga giatubang sa ilang buhatan, sama sa pagkunhod sa pondo o budget, padayon gihapon ang OVP sa paghatag og direktang serbisyo sa katawhan. Naglakip niini ang medical ug burial assistance nga kasamtangang gipahimuslan sa mga benepisyaryo sa Sugbo, Bohol, ug Siquijor pinaagi sa ilang satellite office.
Subay niini, gidapit sa OVP ang tanang estudyante, empleyado sa gobyerno, ug ang pampublikong katawhan sa pagbisita sa maong libreng exhibit aron mas masabtan ug mapasalamatan ang mga kontribusyon sa mga naging lider sa nasod.
