CEBU CITY-Nasakmit sa gipahigayon nga buy-bust operation sa City Intelligence Unit sa Cebu City Police Office sa Barangay Bulacao ning dakbayan sa Sugbo ang motimbang sa 1.8 kilo sa gituohang shabu nga nagkantidad og P12,240,000.
Giila ang duha ka suspetsado nga sila si Joevane Padigos Dela Cerna alyas ‘Panoy’, 46-anyos ug Franco Cortes Corominas o nailhan nga ‘Daot’, 44-anyos.
Matud pa ni Police Colonel Ireneo Dalogdog, ang hepe sa CCPO nga gipaubos ang duha sa surveillance human nga mitumaw ang ilang mga pangalan sa miaging operasyon hinungdan nga sulod sa pipila ka semana, gimonitor sa kapulisan ang ilang mga lihok.
Dugang pa nga maka-dispose kini og 3 ngadto sa 4 ka kilo sa iligal nga drogas matag semana diin ang ilang supplier usa ka drug personality nga anaa sa Leyte Regional Prison.
Gani, gidayeg ug mipadayag og pasalamat si Police Colonel Ireneo Dalogdog, ang hepe sa CCPO sa malampusong pagkasikop ilabi na kang ‘Panoy’ nga usa sa mga High-Value Individual.
