MANDAUE CITY-Nasakmit ang anaa sa P13.6 milyones nga kantidad sa gituohang shabu atol sa drug sting sa Sitio Aroma, Brgy. Subangdaku, Mandaue City, Cebu Septiyembre 6, 2024.
Kung diin, nakuha kini sa suspek nga usa ka 17-anyos nga lalaki nga taga Ubay, Bohol, kinsa nadakpan na.
Matod sa Philippine Drug Enforcement Agency sa Central Visayas (PDEA-7), ang naasoy nga Minor, giklasipikar nga high-value target.
Usa usab siya ka bag-ong giila nga drug personality.
Nakuha sa mga operatiba gikan sa suspek ang lima ka pakete sa gituhoang shabu nga motimbang og duha ka kilo ug uban pang ebidensiya nga dili druga.
Ang nasakmit nga mga ebidensiya sa drugas adunay average market value nga P13,600,000.
Ang tigpamaba sa PDEA-7 nga si Leia Alcantara niingon nga tulo ka semana ang ilang gihimo nga case buildup sa wala pa ang operasyon.
Kini human sila nakadawat og tip bahin sa ilegal nga kalihokan sa batan-on.
Ang buy-bust gihimo sa mga ahente sa PDEA-7, Naval Forces Central, Mandaue City Police Office (MCPO) Drug Enforcement Unit (DEU), ug Police Regional Office (PRO) 7 DEU.
Matud usab ni Alcantara nga maka-dispose ang suspek og usa ka kilo sa ilegal nga drugas matag semana.
Sa pagsuwat ning balita, anaa na sa kustodiya sa mga otoridad ang suspek.
Mag-atubang siya og kasong paghupot ug pagpamaligya og ilegal nga drugas.
