CEBU CITY — Gipanglarot sa mga sakop sa Danao Police Station ang 14-million pesos nga balor sa marijuana plants sa bukirang bahin sa syudad sa Danao, Cebu.
Nasakmit sa kapulisan ang 4.1 million pesos nga kantidad sa mga tanom sa marijuana sa Sitio Tohub, Brgy. Licos nga miresulta sa pagkasikop sa giingong mga cultivators nga silang Benjie Depositario (34 anyos), Inocentes Depositarios (59 anyos), Berting Depositario (27 anyos), ug Melvin Depositario (30 anyos).
Matud ni Police Senior Master Sergeant Rene Camargo sa Danao Police Station nga nasigpatan sa mga nagpatrolyar nga pulis ang upat kinsang nag-atiman sa halapad nga tamnanan sa marijuana.
Nakuhaan usab si Berting Depositario og usa ka caliber .45 nga armas nga adunay lima ka mga buhing bala.
Pagkalabay sa halos tunga sa oras, laing mga tinanom sa marjuana usab ang gipanglarot sa PNP sa Brgy. Langosig, sa susamang dakbayan.
Nasakmit ang 10-million pesos nga balor sa fully-grown nga marijuana plants gikan nilang Kim Acedillo (20 anyos), Jusan Acedillo (24 anyos) ug Jaime Remesis.
Dugang pa ni Camargo nga pulos mga high value target ang mga pito ka mga dinakpan ug anaa sila sa drug watchlist atol sa ilang surveillance.
Mag-atubang ang mga dinakpan og kasong kalapasan sa Republic Act 9165 o Comprehensive Dangerous Drugs Act ug RA 10591 kon illegal possession of firearms. (with reports by Bombo Lahvi Quiñones/GN)
