CEBU CITY – Mokabat sa P150 milyon nga kantidad sa iligal nga drugas ang nakumpiskar sa hini-usang operasyon sa Lapu-Lapu City Police Office (LLCPO) ug sa Philippine Drug Enforcement Agency (PDEA-7) sa Barangay Suba Basbas dakbayan sa Lapu-Lapu, Oktubre 21, 2020.
Nasikop sa naasoy nga operasyon ang gikonsiderang High-Value Individual (HVI) nga giila nga si Gilbert Lumanog nga taga Brgy. Poblacion, lungsod sa Pinamungajan, probinsya sa Sugbo.
Nakuha sa mga otoridad gikan sa suspek ang 22.1 ka kilo sa iligal nga drugas nga gisulod pa sa yellow foil. Kasamtangan na kining giproseso sa Crime Laboratory alang sa pagsuta sa klase niini.
Personal nga gisaksihan kini ni Police Regional Office (PRO-7) Director PBGen Albert Ignatius Ferro ug mismong si Lapu-Lapu City Mayor Junard “Ahong” Chan kauban si LLCPO chief PCol. Clarito Baja ang maong operasyon.
Gidayeg sa Mayor ang kapulisan ingon man ang mga operatiba sa PDEA-7 sa maong kalampusan subay sa nagpadayong paggukod sa mga naglambigit sa transaksiyon sa iligal nga drugas.
“Nagpasalamat ako sa LLCPO ug sa Regional PNP sa malampuson nga operasyon. Dili kita mohunong hangtod nga malimpyo ang tanang dili maayo nga mga elemento sa komunidad nga mipatay sa kaugmaon sa atong mga katawhan,” sigon pa ni Mayor Chan.
Mas gipalawman pa sa otoridad ang pagsuta sa source sa iligal nga drugas ug ang posibleng pang mga koneksiyon sa suspek.// GBS & EKP
