CEBU CITY – Anaa sa kustodiya sa kapulisan ang menor-de-edad human nga nakuhaan og P4-million nga balor sa ilegal nga drugas atol sa gipahigayon nga buybust operation sa Brgy. Duljo-Fatima, sa dakbayan sa Sugbo.
Gi-rescue sa otoridad ang high-value-target nga si alyas “Jethro”, 16 anyos, usa ka out-of-school youth ug nagpuyo sa nahisgutang dapit. Nasikop ang nahisgutang drug target human kini gipaubos sa usa ka buwan nga surveilance.
Nasayran nga patay na ang amahan ni alyas Jethro samtang nagpuyo sa habagatang bahin sa probinsya sa Sugbo.
Matud sa hepe sa Drug Enforcement Group (DEG) – Visayas nga si Police Lt. Col. Glenn Mayam, nga usa ka tuig nang nalambigit si alyas Jethro sa transaksyon isip myembro sa usa ka bigtime drug group. Nasayran nga anaa sa Central Visayas ang area of distribution sa drugas gikan sa maong drug group.
Dugang pa ni Lt. Col. Mayam nga ang estilo sa maong drug group mao ang paghupot sa mga menor de edad og ilegal nga drugas sa matag transaksyon isip usa ka “runner”.
Nakuhaan si Alyas Jethro og 600 grams nga shabu ug mibalor kini og P4,080,000.
Gibutyag usab ni Mayam nga nagagikan ni Revin Bardon Gonza ang drugas nga nakuha gikan sa menor-de-edad.
Kahinumduman nga nakuhaan si Gonza og minilyon nga balor sa drugas sa miaging buwan sa Brgy. Duljo-Fatima ug nabalhog kini karon sa Cebu City Jail.
