Magpabilin ang maximum suggested retail price (MSRP) nga P43 matag kilo sa imported nga bugas.
Kini ang gipasalig ni Department of Agriculture (DA) Secretary Francisco Tiu Laurel Jr. bisan paman sa gipatuman nga 60 ka adlaw o duha ka buwan nga pagdili sa importasyon sa bugas.
Matod sa kalihim, hugot nilang bantayan ang suplay ug presyo sa kamerkadohan ilabi na sa mga retailer nga namaligya og bugas, wholesalers ug importers.
Gidugang usab niini nga mohimo sila og tukmang aksyon aron mapatuman ang disiplina sa merkado.
Kahinumduman nga una nang gipahibalo ni Presidente Ferdinand Marcos Jr. ang pagpatuman sa duha ka buwan nga pagdili sa importasyon sa bugas aron ma-stabilize ang presyo sa lokal nga bugas ug mapanalipdan ang mga mag-uuma gikan sa barato nga imported nga bugas.
