LAPU LAPU CITY-Malampuson nga nasikop ang usa ka High-Value Individual sa hiniusang operasyon sa Criminal and Investigation Unit, City Drug Enforcement Unit sa Lapu-Lapu City Police Office ug sa mga personnel gikan sa NISG ug NAVFORCEN ubos sa pagdumala ni PCol. Noel Flores, LCPO City Director sa gipahigayon nga entrapment operation gahapong adlawa, Marso 25, 2024 sa Sitio Seaside Brgy. Gun-ob, dakbayan sa Lapu-lapu.
Gialyasan ang suspek nga “APE”, 21-anyos, ulitawo ug lumulopyo sa Blk. 135 Cathlea Bless, Barangay Labangon, ning dakbayan sa Sugbo.
Atol sa operasyon, nasakmit sa iyaha ang mga pakete sa gituohang mga shabu nga gibana-banang motimbang og 775 grams nga nagkantidad og P5,270,000.
Ang mga nakumpiskar nga drugas isumiter ngadto sa Forensic Unit alang sa eksaminasyon ug tukmang kaso sa Paglapas sa Section 5 ug 11 sa RA 9165 ang giandam alang sa pagpasaka sa korte batok sa suspek.
Samtang, gipaambit usab ni Police Lieutenant Colonel Christian Torres, ang tigpamaba sa LCPO nga tungod sa ilang hugot nga pagpatuman sa drugment operation sa naasoy nga dakbayan diin pipila ka mga individual ang ilang nadakpan ug nakuhaan og mga gituohang shabu, ingon man ang uban pang mga iligal nga butang sa maong dapit.
Gani, nagpakita kini nga ang Lapu-lapu City Police Office nagpabiling lig-on sa ilang pakigbatok sa ilegal nga mga butang, ug padayong gipalig-on ang intensive police operations ug patubagon ang mga kriminal.
Ingon man nga gihangyo nila ang publiko nga magpadayon sa pagsuporta sa mga paningkamot sa gobyerno, ilabi na ang pakigbatok sa kriminalidad ug ilegal nga drogas, ug ipadangat sa ilang buhatan ang bisan unsang mga kadudahang kalihokan.
