CEBU – Giklaro ni Leah Quintana, ang tigpamaba sa Department of Social Welfare and Development (DSWD) nga niadtong pang Hunyo 29, 2022 nagsugod ang pagpanghatag sa P500 nga monthly cash grant nga alang sa mga kabus nga pamilya sa nasod.
Ubos sa Targeted cash Transfer (TCT) program, dul-an sa 1.2 milyones ka mga benepisyaryo nga adunay mga cash card ang makadawat sa unang tranche sa maong cash aid nga nagkantidad og P1000 o duha ka buwan nga kantidad sa subsidy.
Lakip sa mga benepisyaryo nga makadawat og cash aid mao ang 4 ka milyon nga mga miyembro sa Pantawid Pamilyang Pilipino Program (4Ps), 6 ka milyon nga non-4ps, mga indibidwal nga kanhi benepisyaryo sa Unconditional Cash Transfer Program sa 2018 ngadto sa 2020 ubos sa Tax Reform for Acceleration and Inclusion Law lakip na ang mga benepisyaryo sa Social Pension Program ug ang 2.4 milyones ka mga panimalay nga nalakip sa poverty data sources sa DSWD.
Sa pikas bahin, gitataw ni Quintana nga dako og tabang ang 4P’s sa katawhang Pilipino nga gikonsiderang kabus sa nasod ug mao kini ang nag-unang programa sa gobyerno aron makunhoran ang kalisud sa mga kabus.
Ang maong pamahayag ni Quintana nagsubay na sa sugyot sa pipila ka magbabalaod nga ipatangtang ang 4P’s gumikan nagsalig na niini ang ubang Pilipino.
