CEBU CITY-Mibalik sa prisohan ang usa ka ex-convict human nakuhaan og P6.8 milyones nga balor sa gituohang shabu atol sa buy-bust operation sa Barangay Mabolo, dakbayan sa Sugbo.
Giila ang suspek nga si Harold Domen Yu alyas “Jono,” gikan sa Purok 2, Barangay Nagasi, La Carlotta, Negros Occidental ug kasamtangang nagpuyo sa Barangay Mabolo.
Nasayran nga maka-dispose kini og usa ngadto sa duha ka kilo nga shabu matag semana ug gikonsiderar kini nga high-value individual sa mga tinugyanan sa balaod.
Matud pa sa Drug Enforcement Unit sa Police Regional Office-Central Visayas nga gidumala sa 41-anyos ang negosyo sa iligal nga drogas sa iyang igsuon.
Dugang pa nga si Yu nasikop ug nakonbikto na niadtong 2011 sa Branch 30 sa Regional Trial Court sa Dumaguete City tungod usab sa pagkalambigit sa shabu.
Human nga nakagawas kini sa tuig 2016, wala kini nakat-on gani, nibalhin kini sa dakbayan sa Sugbo ug nahimong sinaligan, runner, ug bodegero o tigbantay sa iligal nga drugas sa iyang igsuon nga si Roniel Domen Yu alyas “Oniel,” kinsa kasamtangang gitanggong sa Abuyog Penal Colony sa Abuyog, Leyte.
Kasamtangang anaa kini sa kustodiya sa RPDEU-7 samtang giandam sa mga operatiba ang pagpasaka og kasong kalapasan sa Dangerous Drugs Act of 2002 batok kaniya.
