PROVINCE OF CEBU- Gipanglantawan ang anaa sa dili muminos P650-milyones ang i-alokar sa Kagamhanang Lalawigan sa Sugbo kabahin sa pagpalambo sa mga imprastruktura sa mga tambalanan sa probinsya.
Kini ang gipamahayag ni Dr. Nikki Catalan, ang Capitol Health Consultant diin saysay niini nga gipahibalo na kini sa provincial administrator nga nagtagana na kini og P650-milyones para sa maong pagpalambo sa mga tambalanan nga gidumala sa Kapitolyo.
Pipila lang sa mga gitagana sa proposed allocation kay ang pagpa-upgrade sa mga infirmaries ngadto sa Level 1 health facilities ingon man ang mga Level 1 facilities ngadto sa Level 2 facilities.
Sa pagkakaron, ang probinsya sa Sugbo kay adunay 16 ka mga provincial ug district hospitals diin 10 niini ang infirmaries, duha ang Level 2, ug upat ang Level 1 facilities.
Giangkon sab ni Catalan nga mukabat pa og pipila ka tuig ang hingpit nga pagpaayo sa mga pasilidad sa panglawas aron hingpit nga makab-ot ang pasaad sa administrasyon ni Governor Pamela “Pam” Baricuatro.
Gani sa nakalabayng mga semana lang kay nakapang-gire na og dugang mga personahe ang mga tambalanan sa lalawigan sama sa mga specialist doctors ug nurses ingon man ang pagpamalit og tambal ug uban pang gamitonon sa operasyon sa ospital.
