CEBU CITY-Nasakmit ang kapin sa 10 ka kilo sa gituohang shabu nga mobalor og P68 milyones sa Barangay Carreta, dakbayan sa Sugbo, gahapon, Marso 4, 2024 atol sa gipahigayon nga buy-bust operation sa Regional Police Drug Enforcement Unit 7 kauban ang PNP Drug Enforcement Group 7 ug Philippine Drug Enforcement Agency 7.
Gani, malampusong nasikop ang duha ka bigtime drug personalities nga taga Talibon, Bohol nga giila nga sila si Jaime Auxtero Dajao, 47-anyos ug ang igsuon niini nga si Roberto, 53-anyos.
Base sa imbestigasyon nga ang mga suspek maka-dispose og 10 ngadto sa 20 kilos sa ilegal nga drugas sa mga dapit sa Sugbo, Mandaue, Lapu-lapu City, ug pipila ka bahin sa Probinsya sa Sugbo.
Hinungdan nga gidayeg ni Regional Director, Police Brigadier General Anthony Aberin, ang dedikadong paningkamot sa mga miyembro sa organisasyon sa PNP ug mga kauban niini sa pagpatuman sa balaod nga walay puas sa paggukod sa mga tawo nga nalambigit sa iligal nga drogas sa rehiyon.
Kasamtangang, anaa sa RPDEU7 Detention Facility ang mga dinakpan nga drug personalities samtang giandam ang mga kasong ipasaka batok kanila sa korte.
