CEBU CITY — Gipangita sa mga sakop sa Regional Mobile Forces Battalion (RMFB)-7 ang tag-iya sa halapad nga tamnanan sa marijuana sa bukirang bahin sa Brgy. General Clemaco, dakbayan sa Toledo, Cebu.
Kini human nga ilang gipanglarot ang libuan ka mga stalks ug seedlings sa marijuan nga mikabat ngadto sa P7-million, kauban sa mga sakop sa Philippine Drug Enforcement Agency (PDEA)-7.
Matud ni Police Lieutenant Colonel Wilbert Parilla, ang Officer-in-charge sa RMFB-7 nga unang nakumpirmar sa mga intelligence personnel ang maong plantasyon base sa ilang pagpatrolyar.
Hinungdan nga dali nilang gilarot ang 10,000 ka mga marijuana stalks ug halos 15,000 ka mga seedlings ug gisunog nila kini dayon sa maong lugar apan wala silay naabtang caretaker sa plantasyon.
Dugang pa ni Parilla nga ila pang i-verify kung gipanag-iya ba sa pribadong indibidwal ang halapad nga marijuana plantation.
Subayon usab sa mga barangay officials kung kinsa man ang pirming mo-adto sa maong plantasyon.
Anaa na sa PNP Crime Laboratory ang pipila ka mga tanom sa marijuana aron ipaubos sa laboratory test. (Bombo Gian Navarro)
