PROVINCE OF BOHOL- Nasakmit ang anaa sa kapin P8.8-milyones nga balor sa gituohang shabu atol sa gipasikad nga buy-bust operation sa Purok 6, Barangay Libaong sa lungsod sa Panglao sa lalawigan sa Bohol niadtong Martes sa udto, Pebrero 17, 2026.
Gipalihok ang operasyon sa hiniusang pwersa sa Provincial Intelligence Unit (PIU) ug Provincial Drug Enforcement Unit (PDEU) sa Bohol Police Provincial Office (BPPO) sa koordinasyon na sab sa Panglao Municipal Police Station.
Nasikop ang duha ka indibidwal nga gitanyag nga mga High Value Individual nga mao sila Junne Pame, 41-anyos nga handler ug manok ug lumulupyo sa Taloto, Tagbilaran City samtang ag kauban niini ngasi Levi Fronteras, 48-anyos ug lumulupyo sa Santa Cruz, Calape, Bohol.
Nakuhaan ang duha sa gibana-banang 1,296.4 grams sa gituohang shabu sa standard drug price niini nga P8.8-milyones. Narekober sab sa mga kapulisan ang kalibre 9mm nga unlicensed firearm, mga bala, ug ang gigamit nga marked money sa mga kapulisan.
Sumala sa rekord sa BPPO, si Pame kay nadakpan na kaniadtong 2025 mahitungod gihapon sa kasong illegal drugs apan naabswelto kini.
Kasamtangang nakatanggong sa Panglao Police Station ang duha ka dinakpan diin gihikay ang kaso ipasaka batok kanila samtang ang mga narekober nga ebidensya kay iproseso sa Forensics Unit sa BPPO alang sa eksaminasyon ug pagkustodiya niini.
