CEBU CITY-Naksamit ang kapin sa usa ka kilo nga gituohang shabu sa Regional PNP Drug Enforcement Unit 7 atol sa ilahang gipahigayon nga buy bust operation batok sa usa ka regional high value individual sa Sitio Campar, Barangay Poblacion Pardo, dakbayan sa Sugbo karung adlawa 12:30 sa kadlawon, Biyernes Septembre 8, 2023.
Giila ang suspetsado nga si Manuel Ace Causing alyas ”Teban”, 21-anyos kinsang lumulupyo sa Upper Galilee, Barangay Duljo Fatima dakbayan sa Sugbo.
Nasayran nga ang mga nakuhang dagkong mga putos nga adunay 1,300 grams sa gituohang shabu nga mobalor og P8,840,000 ug gisulod ang illegal nga drugas sa Chinese tea bag ug ang uban gisulod sa pink nga bag.
Apan, gihimakak sa suspek nga dili siya ang tag-iya sa maong butang ug igo ra kining gisugo.
Sa pakighinabi sa Bombo Radyo Cebu News Team kang Police Captain Bonifacio Tañola Jr., RSOG 7 nga nikabat sa halos tulo ka buwan ang pag-obserbar sa maong suspek, usa kini nadakpan sa mga sakop sa kapulisan.
